ਚੇਤਨ ਮੇਰੇ ਨੂੰ ਇੰਝ ਹੀ ਲਿਖਿਆ ਤੜਪਣਾ
ਅੱਖਾਂ ਦੇ ਖਾਰੇ ਛੰਭ ਵਿਚ ਹੀ ਗਰਕਣਾ
ਵਕ਼ਤਾਂ ਦੇ ਪੈਰੀਂ ਫੇਰ ਬਸ ਕੁਝ ਠੀਕਰਾਂ
ਜਿੰਦ ਦੇ ਜਦੋਂ ਕੱਚੇ ਘੜੇ ਨੇ ਤਿੜਕਣਾ
ਹਰ ਸ਼ਾਖ ਤੇ ਉਂਝ ਮੌਲਦੀ ਆਈ ਬਹਾਰ
ਚਾਹ ਦਾ ਬਿਰਖ ਹੀ ਪੱਤਿਆਂ ਤੋਂ ਸੱਖਣਾ
ਦਾਵੇ ਮੁਹੱਬਤ ਦੇ ਕਰੇ ਦਿਲ ਬਾਅਦ ਵਿਚ
ਉਹ ਪਾਸ ਸੀ ਤਾਂ ਭੁਲ ਗਿਆ ਸੀ ਧੜਕਨਾ
ਕੁਝ ਨ੍ਹੇਰਿਆਂ ਅੱਖਰਾਂ ਚ ਲਿੱਖੀ ਸੀ ਗਈ
ਤਕ਼ਦੀਰ ਨੂੰ ਨਾਂ ਰਾਸ ਆਇਆ ਚਾਨਣਾ
ਉਮਰਾਂ ਦੇ ਤੱਤੇ ਮੌਸ੍ਮੀਂ ਦਿਲ ਨੂੰ ਨਸੀਬ
ਯਾਦਾਂ ਦੇ ਮਾਰੂਥਲ ਪਿਆਸਾ ਭਟਕਣਾ
ਤਲਵਾਰ ਹੱਥੀਂ ਆਪਣੇ ਲੈ ਆਂਵਦਾ
ਐਨਾ ਜ਼ਰੂਰੀ ਸੀ ਜੇ ਮੈਨੂੰ ਪਰਖਣਾ
ਹੁਣ ਏਸ ਉਮਰੇ ਰੱਬ ਨਵੇਂ ਕੀਕਣ ਕਰਾਂ
ਤੇਰੀ ਹੀ ਸਰਦਲ ਤੇ ਹੈ ਮੱਥਾ ਟੇਕਣਾ
No comments:
Post a Comment