ਕੌਣ ਮੇਰੇ ਸ਼ਹਿਰ ਆ ਕੇ ਮੁੜ ਗਿਆ

ਦਿਲ ਮੇਰੇ ਦਾ ਆਸ਼ਿਆਂ ਉੱਜੜ ਗਿਆ
ਮੌਸਮੀ ਪੰਛੀ ਬਿਠਾਇਆ ਉੜ ਗਿਆ


ਧੁਰ ਨਸਾਂ ਵਿਚ ਵਿਲਕਦੇ ਮੇਰੇ ਖੂਨ  ਦਾ
ਆਖਿਰੀ ਕਤਰਾ ਅੱਖੀਂ ਨੁੱਚੜ ਗਿਆ


ਇਸ਼ਕ ਦੇ ਨੱਕਾਸ਼ ਦਿਲ ਤੇ ਉਕਰਿਆ
ਜਿੰਨਾ ਤੈਨੂੰ ਮੇਟਿਆ ਉੱਘੜ ਗਿਆ


ਅੱਖ ਭਰ ਤਕ ਲੈਣ ਦਾ ਤੈਨੂੰ ਮੇਰਾ
ਹਿਰਖ ਐਨਾ ? ਕੀ ਹੈ ਤੇਰਾ ਥੁੜ ਗਿਆ


ਸਾਹ ਕਥੂਰੀ ਭਰਦੀਆਂ ਪੌਣਾਂ ਫਿਰਨ
"ਕੌਣ ਮੇਰੇ ਸ਼ਹਿਰ ਆ ਕੇ ਮੁੜ ਗਿਆ "*


ਕੀ ਕਰਾਂਗੇ ਦਾਸਤਾਂ ਜੇ  ਹੋ ਗਏ
ਨਾਮ ਤੇਰੇ ਨਾਲ ਮੇਰਾ ਜੁੜ ਗਿਆ


ਨੂਰ ਸਾਰੇ ਆਲਮਾਂ ਦਾ ਮੁਸਕੜੀ
ਬਣ ਤੇਰੀ ,ਬੁੱਲੀਂ ਤੇਰੇ ਸੁਕੜ ਗਿਆ 




*ih line Shiv Bataalwi di hai