ਚੰਦ ਦੇ ਉੰਝ ਤਾਂ ਅੰਦਰਲੇ ਵੀ ਦਾਇਰਿਆਂ ਦੇ ਵਿਚ ਰਿਹਾ
ਚਾਨਣਾਂ ਨੂੰ ਹੱਥ ਲਾਉਣਾ ਉਮਰ ਭਰ ਵਰਜਿਤ ਰਿਹਾ
ਲੰਮ-ਸਲੰਮੇ ਸ਼ਾਮ-ਪਰਛਾਵੇਂ ਘੁਲੇ ਮਿਲ ਆਪਸੀ
ਸੋਨੇ ਰੰਗੀ ਕਣਕ ਪਿੱਛੇ ਲਾਲ ਸੂਰਜ ਛਿਪ ਰਿਹਾ
ਰੰਗ-ਬਰੰਗੇ ਪਰ ਫੈਲਾਂਦੇ ਆਏ ਵੀ ਪੰਛੀ ਕਈ
ਮੇਰੀ ਦਿਖ ਦਾ ਪੌਣ-ਪਾਣੀ ਹੀ ਨਹੀਂ ਮਾਫਿਕ ਰਿਹਾ
ਜ਼ਹਰ-ਮਾਰੇ ਲੇਖ ਤੋਂ ਤਾਂ ਸੀ ਕੁੜੱਤਣ ਹੀ ਉਮੀਦ
ਦਿਲ ਮੇਰਾ ਤਾਂ ਸ਼ਹਿਦ ਤੋਂ ਵੀ ਜ਼ਹਰ ਦਾ ਜਾਚਿਕ ਰਿਹਾ
ਫਿਰ ਸਦਾ ਲਈ ਪੱਸਰੀ ਚੁਪ-ਭੁਖ ਸ਼ਹੀਦਾਂ ਦੇ ਘਰੇ
ਚਾਰ ਦਿਨ ਅਖਬਾਰ ਦੇ ਪੰਨਿਆਂ ਤੇ ਕੁਝ ਚਰਚਿਤ ਰਿਹਾ
ਚੰਨ ਦਾ ਸੱਗੀ-ਫੁਲ ਸਜਾ ਮੱਥੇ ਗੁਜ਼ਰ ਗਏ ਚਾਰ ਦਿਨ
ਰਾਤ ਦੀ ਦੁਲਹਨ ਦੇ ਮੁਖ ਤੇ ਤਾਰਿਆਂ-ਚੇਚਕ ਰਿਹਾ
ਰਾਤ ਦੇ ਮੁਖ ਤੋਂ ਹਨੇਰੇ ਦਾ ਦੁਪੱਟਾ ਸਰਕਿਆ
ਦੂਰ ਦਿਸ-ਹੱਦੇ ਦੀ ਹਿਕ ਤੇ ਪਹੁ-ਫੁਟਾਲਾ ਦਿਖ ਰਿਹਾ
ਵੰਨ-ਸੁਵੰਨੇ ਮੌਸਮਾਂ ਦਾ ਆਣ-ਜਾਣਾ ਲੱਗਿਆ
ਨੈਣ ਬੁਲਬੁਲ ਦੇ ਵਿਰਾਨਾ ਸੀ,ਇਹੀ ਨਿਸ਼ਚਤ ਰਿਹਾ
ਹਥ ਕਲੀਰੇ ਮਹਿਲਾਂ ਵਾਲੀ ਦੇ , ਤਲੀਂ ਮਹਿੰਦੀ ਰਚੀ
ਕੁੱਲੀਆਂ ਦੀ ਧੀ ਦੇ ਹਥ ਰੱਟਣ ਹੀ ਸੀ ਕਿਸਮਤ ਰਿਹਾ
No comments:
Post a Comment